جالى تاج من العزيز محمد سمير وشماعة واتأخرت عليهم لظروف خاصة بس كنت سعيدة عشان كنت بشوف التاجات دى وبقول يعنى ايه تاج ؟ وجالى التاج يا اهلا وسهلا
انت مين ؟
أنا واحدة رومانسية وبحب الناس مش مهم عندى كام سنة عشان انا عندى كل سنوات العمر ببقى 18 اما اتكلم مع حد عنده 18 سنة وببقى 30 و40 و60 اما اتكلم مع اشخاص عندهم الاعمار دى
مين اكتر 6 اشخاص بتحبهم ؟
هما كتير طبعا من ضمنهم بناتى واخواتى وكل المدونين دولا
انت سعيد ؟
الحمد لله فى اوقات كتيرة فى حياتى اما بفتكرها ببقى سعيدة جدا حتى لو انتهت من حياتى
لو اجتمعت انت وحسنى مبارك فى غرفة واحدة ؟
لو اجتمعت بأى حد مشهور شخصية عامة يعنى اى ان كان مش حسأل انت بتعمل كدة ليه او ايه اخرتها فى اللى بتعمله , انا بحاول ادخل جوة ملامح الشخصية واركز فيها عشان احاول اكتشف هو ايه وشخصيته دى اكتسبها ازاى واللى بيعمله ده نابع من ايه هل البيئة اللى اتربى فيها وللا عوامل نفسية كتيرة متراكمة ودماغه دى جواها ايه وليه واحتمال كبير افضل اسأل لحد اما احاول اوصل
لو معاك مليون ونص جنيه .. تعمل بيهم ايه ؟
حطلع منهم زكاة المال او يعنى حتبرع بجزء منه لله ولبناتى جزء والباقى حخليه فى البنك لأى ظروف تحصل عشان الحوجة وحشة
بتحب مصر ؟
أيوة
بتحب البنات / الاولاد ؟
بحب البنات جدا واما كنت فى الولادة التانية كنت بدعى ربنا يدينى بنت تانية عشان تبقى صاحبة لأختها .. والاولاد برضه بحبهم بس تربيتهم صعبة
انت مسلم ؟
الحمد لله وبصلى وبصوم ونفسى اعمل عمرة وحج .. آمين
ليه ؟
طبعا اما كبرت وفهمت اقتنعت ان الدين الاسلامى هو آخر الديانات وان سيدنا محمد هو آخر الانبياء وحمدت ربنا انى مسلمة
مين اكتر شخصية متقدرش تستغنى عنها فى حياتك ؟ وليه ؟
هما نفس الشخصيات اللى جاوبت عنهم فوق
ايه اكتر موقف محرج اتعرضت له فى حياتك ؟ واتصرفت ازاى ؟
كنت راجعة من الجامعة ولاقيت ابن خالتى شاور لى وهو فى العربية ووقف عشان يوصلنى ماهو ساكن فى الشارع اللى ورانا وام رحت لحد عنده عشان اسلم عليه لاقيته حد تانى معرفوش رحت قايلة له انت قليل الادب انا افتكرتك ابن خالتى ومشيت وانا مكسوفة اوى .. كانت نفس لون العربية وماركتها حتى اللو سايقها يشبه له كتير او متهيألى كدة اصل الدنيا كانت ليل
ايه الامنية اللى بتدعى ربنا دايما انه يحققها لك ؟
الستر والصحة والمغفرة لبناتى وكل اللى زيهم وكل امة محمد عليه الصلاة والسلام وليا ولأهلى ويرحم ابويا وكل الاموات المسلمين
تمرر التاج ده لمين ؟
بصراحة مش عارفة .. ممكن يكون اتمرر عليهم وعموما
انتظار مؤقت
bos bos
قلوب حارة
ايامنا الحلوة
لومى
وكل اللى بيدخل عندى ومش جاله تاج قبل كدة
ملحوظة : التاج اللى بعد كدة هيكون تاج أنتظار مؤقت
هناك ٣١ تعليقًا:
يااه
انا مش كنت اعرف ان عندك اولاد ربنا يخليهملك
كلامك حلو بصراحه واجاباتك جديده والموقف المحرج بصراحه محرج جدا
بس تصرفك كان كويس وبسرعه بديهه تحسدي عليها
طبعا اتمنالك ان ربنا يحققلك كل احلامك
ويجمعنا ف الجنه
وطبعا كلمتي الشهيره
انا اول تعليق
yes i made it
ولو
***
ربنا يخليك كلامك هو اللى حلو وانا سعيدة انك اول تعليق ويارب كدة دايما
ربنا يخليلك ولادك
واجاباتك منطقيه جدا
بالذات في السوال بتاع بتحبي البنات ولا الولاد
لان انا بحب البنات اوي
مش تفهميني غلط
انا فعلا لما اتجوز نفسي اخلف بنت
تحياتي
ربنا يبارك فى بناتك
ويرزقك بالحج والعمره
شاب نفسه يحقق حلمه
****************
ازيك يا طارق .. يعنى انا حفهمك غلط ليه ؟؟ عادى فى رجالة كتير بيحبوا البنات مش معنى كدة انهم وحشين ويارب اما تتجوز تخلف بنات كتير مش بنت واحدة وعلى فكرة انا بحترمك وبحترم رومانسيتك انت شاب اعتقد انك من جواك حلو .. ربنا يوفقك
عازف الناى
**********
آمين .. اشكرك على مرورك
انا لما قرات ردك علي الأسئلة، حسيت بفرحة كبيرة بسبب حبك لبناتك، شعرت اد ايه حلاوة الأحساس بالامومة وان الإنسان يكون ليه شيء منه عايش معاه هو اللي بيعلمه ويربيه.
ربنا يخليهم ليكي ويحميهم.
شماعة
***
اشكرك على تعليقك وان شاء الله بكرة تجرب احساس الابوة ولو ان المشاعر دى بتتولد معانا بالفطرة ومع البنات اكتر .ز تحياتى
اجاباتك حلوه اوي
اول مره اجي و ان شاء الله مش الاخيره
ربنا يزيدك حب وعطاء
ويخلي لك ابناءك
بوسي
ردودك جميلة كنت هسأل سؤال كنت راجعة من الجامعة متأخر ليه لغاية الدنيا ما بقت ليل ولا نظرك ضعيف ومش لابسه نضارة
ههههههههههههه
تحياتي
كراكيب عادل
***********
الله يخليك ياعادل ويخللى لك ابنك الجميل
Ert3ashat
*********
وانت كلامك حلو اوى وياريت تبقى تيجى المدونة .. تحياتى
mimi
****
كنا فى الشتاء والساعة كانت 8 ده انا حتى سبت المحاضرة ومشيت .. ومكنتش لابسة نضارة ولا حاجة ... تحياتى
انا برضة اول مرة اعرف ان عندك بنات بسم الله ما شاء الله ربنا يخليهوملك يارب
واجاباتك جميلة اوى بجد ...ربنا يحفظك
لا يا ستي انا نفسي في بنت واحده بس ومش هجيب غيرها ان شاء الله علشان اديها كل اهتمامي تحياتي الشديده ليكي وشكرا علي المجامله الرقيه دي ن انسانه رقيقه جدا
سلام
ELGaZaLy
********
غزالى ازيك . ايوة الحمد لله عندى بنتين وزى القمر اديك عرفت اهه حتعمل ايه بقى ؟ .. تحياتى
شاب نفسه يحقق حلمه
*****************
ازيك يا طارق على فكرة انا مش بجامل خالص وبقول دايما اللى بحس به .. اشكرك
ندعوكم لزيارة العدد الثالث لمجلة نفسنا
اوك يا بسبس هجرى والحق لى عدد يا جميل
عزيزتى
معاكى حب مش بالعمر تتحسب السنين بعد افراحه واحزانه حسناته وسيئاته
حبك للمدونين طغى على اصدقائك ولا ايه
اكيد كلنا لينا لحظات سعاده
لو اجتمعتى بيه اكيد هتهتفيله ياخوف يا طمع فى شئ
وانا برضوا هعمل زيك كلنا فى الهوا سوا
اظن المبلغ كبير ومها بيكون معانا فلوس وهى بعيده بتكون كتيره لما تكون معانا بنحس بقلتها طمع بقه
ومين مش بيحب مصر اللى بيخونوها صدقينى بيحبوها بس الحاجه تولد الكفر
هو موقف محرج بس فى مواقف بالنسباله الموقف ده شكت دبوس
تحياتى
سلام
Hosam
*****
حسام اشكرك على كلامك اللى حسيت منه انك مش مقتنع بأجاباتى ايوة انا بحب المدونين عشان انا معنديش أصدقاء وبسميهم اصدقائى عالورق , وحكاية انى لو اجتمعت به حهتف له خوف او عايزة حاجة دى مش ممكن تحصل عشان مش دى شخصيتى وبعتبلر اللى بيعمل كدة بينافق او بيمسح جوخ وانا لو من الموع ده كانت حياتى اتغير فيها حاجات كتير من زمان وبقى عندى اصدقاء بعدد شعر راسى واللى يعرفنى يعرف عنى كدة , اما حكاية الفلوس انا اما بيبقى معايا فلوس كتير مش بقول لا دى قليلة وبكون طماعة بالعكس دى مش بتهمنى خالص هى مجرد وسيلة لسد احتياجاتى وانا الحمد لله احتياجاتى بسيطة , انا عارفة ان فى مواقف كتير محرجة اكتر من اللى انا اتعرضت له بكتير بس ده بالنسبة لى كان فعلا موقف محرج .. اشكرك وتحياتى
مع انى مش عارف ليه مفروض نعلق على التاج بس اوك
اجاباتك دبلوماسيه زى اجابات بتوع لجنه السياسات
كمان انتى ماشاء الله لبقه جدا
اغلب اجابات عامه يعنى بتعرفى تهربى لما بتكونى مزنوقه
تحياتى
اجابات حلوة ربنا يحققلك اللي بتتمنيه
اتاخرت عليكي في التعليق معليش غصب عني
المهم اجاباتك جميلة وصادقة اوي
بس على فكرة..لما كنت مستني البيبي كان نفسي يكون ولد عشان الولاد هما اللي تربيتهم اسهل بكتير من البنات لكن لما وصلت الانسه فرح ماقولكيش انا طاير بيها ازاي الحمد لله
انا بحب البنات جدا بس بردو الولاد اسهل من البنات في التربية والرعايه يعني مش هشيل همه اوي ولو زعلان يخبط دماغة في اقرب حيطة انما البنوتة ماينفعش تنام زعلانه
لازم تدلع
:):)
تحياتي ليكي
محمد سمير
ربنا يحققلك اللى نفسك فيه
سعيد بزيارة مدونتك واتمن تشرفينى فى مدونتى
Very Nice Blog
momken
******
اشكرك على كلامك بس لجنة سياسات ايه ياعم اللهم احفظنا
غمض عينييك
**********
كل ده وانت مغمض عينييك؟ انت فينك من زمان وربنا يخللى لك الولد والبنوتة الجميلة انا بحب اسم فرح وربنا يخلليك وتدلعها دايما .. تحياتى
sendbad
********
ربنا يخليك .. اشكرك
اسلام رفاعى
**********
يارب كلنا نحقق اللى نفسنا فيه .. واكيد حزور مدونتك .. تحياتى
Howa Wa Heya
************
thanks
يدعوكم موقع مدون خانه (تحت الانشاء)الى الاجتماع من اجل الاتفاق على الخطوات النهائيه لنشاء مجمع المدونين (مدون خانه)وذلك يوم السبت القادم الموافق 28 / 7 / 2007 وذلك الساعه 6 مساء يوم السبت فى مركز العربى للدرسات العنوان 23 شارع باهر زغلول من شارع المنيل
اجابا- ت جميله
ربنا يوفقك
تحيا تى
إجابات دبلوماسيةة جدا
أزيك عاملة ايه يابوسي والحر عامل معكو ايه يارب تكوني بخير عارف أني كسلان بس يوميات محتار حاسس أنها هتعمل صدمة لناس كتير وهتهاجمني فيها مش لسمح الله اني هخرج بره حدود اللياقة في الكتابة أو علشان هتناول مواضيع شائكة الحمد لله أني مش من أصحاب الاراء اللي بتفرقع لكن أنا بركز وبكشف شريحة موجود عندنا في المجتمع مكدبش عليكي قلقان جدا من تناولها الشخصيات كتير وانا لسه بحبي في عالم الكتابة أدعيلي وان شاء الله قريب هيطلع الجزء الاول للنور
عذرا للمقاطعة
نحتاج الى رأيك ودعمك في حملة القضاء على المخدرات انتظرك هناك
www.tw3ya.blogspot.com
نونا العزيز
واضح شخصيتك الجميلة من ردودك التلقائية الودوده..امنياتى لك بالتوفيق وان تصلى وتحقيقى كل ما تامليه
عزيزتى
ايه الغيبه دى كلها
مفيش جديد
طيب متحرمناش من زياتك
علشان نطمن عليكى على الاقل
سلمى على الاختين الحلوين
اكيد قمرين
سلام
إرسال تعليق