رسالة وداع

سيدى

بعد مرور عام من لقاء قلبينا فى عالم الرومانسية التى كنت أفتقده

اعترف أننى عرفته معك

أعترف انك أنت وحدك الذى جعلتنى أشعر بأن لى قلب يعرف معنى الحب

ولكن ....

أعترف أيضا أننى لم أكن الوحيدة فى حياتك

نعم ..

كنت أعلم ذلك وأقولها بكل مشاعرى المجروحة فالمرأة هى الوحيدة التى تملك هذه الحاسة

سيدى

بقدر ماكنت أشعر أن حبك فى قلبى كان بمثابة جنين ينمو فى أحشاء أمه وكم كانت سعادتى بهذه المشاعر الجميلة ... بقدر ألمى وتعاستى وأنا أقول لك ...

وداعا سيدى

نعم

اللسان ينطق بالوداع

والقلب يرفض الوداع

لعلك تعرف أن دموعى تنزل على هذه الكلمات وتحرقها قبل أن تصل إليك

ولكن ...

الآن فقط

دموعى أصبحت ملكى وحدى لن يراها أحد بعد الآن حتى أنت سيدى لأنها لا تهم أحد غيرى ولن يفهمها أحد غيرى

فهى الآن رفيقتى وقت حزنى وفرحى

وداعا رفيق القلب والروح

وداعا حبيبى

بلا عنوان

شعرت بحنين جارف إليك

أغمضت عينى واستغرقت بإحساسى فى جسدك الدافئ فى ليلة البرد القارسة

وتذكرت أيضا ملامحك الدقيقة .. ولون بشرتك الخمرية

ووجدتنى أبحث عن أوراقى وقلمى الفضى المحفور عليه حروف اسمك

.. فقلت لى يوما أنك احببت اسمك يوم أن ناديتك به ..

أتذكر ؟؟؟

وجدت أوراقى وقلمى

ورأيتك أمامى ورسمت ملامحك وجسدك بقلبى الذى ملكته .. لا بعينى ..

أتفهمنى ؟؟؟

وأكملت الصورة , ووضعتها أمامى

وتذكرت كلماتك العذبة لى

" أنتِ كل النساء "

" أنتِ إمرأتى الوحيدة فى هذا الكون "

وبحثت مرة أخرى عن أوراقى , وقلمى الفضى

ووجدتنى أكتب إليك رسالة

بدايتها كانت ..

" إلى أجمل رجل فى حياتى "

ودون أن أشعر

سقط منى قلمى

وتبعثرت أوراقى

وتسمرت عيناى على موضع صورتك التى رسمتها

ولكن ..

لم أجدها

يا الهى

أين الصورة

؟

!

أين أجمل رجل فى العالم ؟؟

!

وتذكرت آخر جملة قلتها لى :

" أننا حلم "

نعم

أعرف أننا حلم

فأنت أحببت الأنثى التى بداخلى

لم تنظر يوما لعقلى

لشخصى

أو حتى لقلبى الذى جرحته بكلماتك

ولملمت أوراقى وقلمى الفضى

ولملمت قلبى المجروح .. الرافض لهذا الحلم

عفوا ..

الظروف التى جعلت حب حياتى حلما

والآن

أبحث عن الحقيقة .. الحب ؟؟!!

تاج جديد من غمض عينيك

جالى تاج جامد جدا من العزيز غمض عينيك اسئلته صعبة وحنشوف فيه ايه ياللة عالتاج

قالوا لك اختارى عصر من عصور مصر علشان تعيشى فيها تختارى أى

عصر وفى عهد أى حاكم .. واشمعنى ؟

أختار عصر الخليفة عمر بن الخطاب عشان كان عادل جدا وانا دلوقت عايشة فى وقت مش فيه عدل فى اى حاجة لا فى الشغل ولا فى العيشة ولا فى المعاملات الخاصة او العامة .. مفتقدة العدل جدا



أول أولوية فى حياتك عيلتك ولا شغلك ولا اصحابك ؟

بناتى



ايه أكتر حاجة بتحبها فى رمضان ؟

الصوم والتراويح



أوصفى أجمل فطار ممكن تفطريه ؟

اجمل فطار اما أكون فى لمة كدة وناس كتير بيفطروا مع بعض فى نفس الوقت ده احساس حلو أوى

لو انت حاكم على مجموعة من الأفراد حتكون عادل ؟ طب حتتأكدى أزاى انك حاكم عادل ؟؟

ححاول أكون حاكم عادل عشان مش بحب الظلم .. وحمشى فى الشوارع وسط الناس من غير حرس او حاشية وحنام تحت شجرة زى سيدنا عمر بن الخطاب

ايه اللى بيبوظ الحكام .. نفسهم ؟ ولا الشعب ؟ ولا الحاشية المقربة ؟؟

اولا اللى بيبوظ الحكام انهم بيبقوا عندهم أستعداد من جواهم انهم يبقوا غير عادلين عشان نفوسهم مش بتكون مليانة بالخير وبعد كدة بقى يدوا ودانهم لأصحاب السوء لأنهم بيبقوا عجينة واحدة ماهى الطيور على أشكالها تقع

مين أكتر اعلامى مصرى بتحترميه ؟

مش عارفة.. بس أنا بحب أسمع مفيد فوزى وحمدى قنديل ووائل الابراشى ...

قريتى ديوان عمر مصطفى صاحب بلوج "أسباب وجيهة للفرح" عن دار ملامح ولا لسة ؟؟

لا .. مش أعرفه خالص

لو ممكن تشتغلى شغلانة تانية كنتى تتمنى تبقى ايه ؟؟

صحفية .. دكتورة نفسانية .. اخصائية اجتماعية فى ملاجئ او سجون

ايه تانى بلد تتمنى تعيشى فيها بعد مصر ؟؟

اليونان .. اسطنبول ... الخ

اوصفى ترتيبات اجمل فرح ممكن تحضريه ؟

لو عشت أعتقد حيبقى فرح البنات حيكون تحفة

بتراعى كلام الناس والقيل والقال ؟؟ ولو اه او لا قولى ليه ؟

مش من اى حد عشان الناس مش بيعجبهم حاجة خالص وكل واحد له عقله وتفكيره ومش ممكن حنجارى كل عقلية او كل تفكير .. الناس بقت بتقيس تصرفات بعضهم من الظاهر وبمقياسهم هما بس

صحيتى من النوم ملقتيش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكونى سعيدة ؟

اكيد ..شوية هدوء بقى

السعادة هى ..؟

الرضا .. بس مفيش رضا كامل او الرضا بيكون فى حاجات وحاجات

عندك أمل ؟ اسبابك ؟

فى حاجات معينة معنديش فيها أمل عشان نفسى تتحقق ومش حتتحقق

لما بتحبى تهربى من كل شئ بتروحى فين ؟؟

بصراحة مش بعرف أهرب خالص والتفكير بيموتنى

امتة اول مرة خدتى فيها نفس طويل وقلتى ياااه انا فعلا كبرت ؟؟

ههههههه .. بجد لسة مش حصلت

اما بتعملى عمل خير بيكون ايه هو دافعك الاول ؟

اعمل الحاجة اللى المفروض اعملها وواجب عليا زى زكاة المال ومساعدة محتاج وقت السؤال

بتشربى سجاير ؟؟ وايه شعورك اما ست او راجل بيشرب سجاير ؟ ليه ؟

لا .. مش بحب ريحتها خااالص .. الست اللى بتشرب سجاير بحس ان مفيهاش ريحة الانوثة

بتعرفى ايدك اليمين من الشمال ازاى ؟؟

اما بساعد حد او آكل او اكتب

ايه اكتر الة موسيقية بتحبيها ؟

البيانو .. الكمان

فى رأيك ليه الذوق والنخوة اتعدموا ؟

عشان الضغوط النفسبة الكتييييييرة اوى بسبب المشاكل وقلة الحيلة ... الخ

ايه الحاجة اللى لو حصلت لك حتبقى سعيدة اوى ؟

بصراحة كذا حاجة .. اقضى الفريضة .. وحاجة تانية خاصة جدا

تحبى يبقى عندك ارض زراعية ولااجنس عربيات ولاكام عمارة ولافلوس فى البنك ؟

بحب اوى الخضرة والورود وفى وسطهم فيلة عالطراز الانجليزى

وفلوس عشان اعيش

البحر ولا النيل ؟

البحر وخصوصا وقت الغروب

مركب ولا طيارة ؟

كل حاجة لها وقتها المركب اما اكون بتفسح مع حد بحبه والطيارة وقت السفر

مجنونة ولا عاقلة ؟

مجنونة جدا فى اوقات معينة وعاقلة جدا برضه فى اوقات معينة

تقراى كتاب ولا تتفرجى عليه فيلم ؟

أقرأ كتاب طبعا عشان بحب اعيش مع خيالى

تمررى التاج ده لمين ؟

volcano

عازف الناى

انتظار مؤقت

شاب نفسه يحقق حلمه

اللهم تقبل منا رمضان

اللهم تقبل منا رمضان

إختراق الجسد والقلب

أيهما أسهل إختراق الجسد أم إختراق القلب ؟؟ .. السؤال ده كان من وحى قصة قرأتها لإحسان عبد القدوس الجميل فأنا اعشق رواياته ووصفه لمشاعر المرأة عندما تحب .. نرجع للجملة التى قيلت على لسان بطلة الرواية - وهى إمرأة متزوجة رجلاً لا تحبه , ربما لأنه ينظر إليها نظرة إحترام ويحبها ويقبلها بإحترام , يعاملها كزوجة محترمة وليست كأنثى تعيش مع رجل يشعرها بأنوثتها , وكان هذا الإحساس يقتلها وتود أن تقابل رجلاً يخترقها ويستحوز على انوثتها , وعندما قابلت هذا الرجل ونظر إليها أحست بأن انوثتها تفجرت لتعلن عن وجودها كإمرأة , وأحبت هذا الرجل وبعد القبلة الأولى بينهما قالت جملتها التى لمست كيانى وأحسست أيضا أنها تتكلم بلسانى وهى " من السهل على الرجل أن يخترق جسد المرأة ولكن من الصعب عليه أن يخترق قلبها " وأنا بصفة شخصية مع هذا الإحساس قلباً و قالباً و من وجهة نظرى أن إختراق الرجل لجسد المرأة سهل جداً ولكن إختراق قلبها أمر صعب جداً جداً .. والإحساس ده نابع من تجربة شخصية , فالحب عندى أو الإحساس بالحب تجاه رجل معين عزيز جداً ونادر فى حياتى ..

والسؤال للرجل هل صعب عليك إختراق قلب المرأة ؟؟

والسؤال للمرأة أيهما أصعب عندك إختراق الرجل لجسدك أم قلبك ؟؟ بصرف النظر عن الأسلحة التى يستخدمها الرجل للوصول لقلبك مثل الكلمات المعسولة والحنية وووو ..

طبعاً دى وجهات نظر بتختلف من شخص لآخر سواء الرجل أو المرأة على حسب الظروف والحالة النفسية فى وقت معين ..

بصراحة الحكاية دى شدتنى وفكرت فيها وحبيت أعرف رأيكم ووجهة نظركم .

تاج طويل بس لذيذ

جالى تاج تانى من العزيز محمد سمير اللى مغمض عين ومفتح عين وأنا سعيدة جدا انه دايما فاكرنى عشان كدة مقدرش أتأخر عليه .. شكرا يا محمد عالتاج .. ياللة بينا نشوف التاج فيه

اسم مدونتك ؟
حنين


لماذا أخترته .. وماهى نيتك وراء أختياره ؟
بحب أغنية فيروز اللى بتقول أنا عندى حنين ما بعرف لمين .. لكن أنا بقى كنت عارفة .. أخترت الأسم ده عشان عندى حنين لحاجات كتير اوى مفتقداها فى حياتى أو وحاجات وأشخاص أما ضاعوا منى حسيت بحنين جامد لهم .. عايزين تعرفوا انا مفتقدة ايه ؟؟
الزمالة الحقيقية فى العمل البعيدة عن أى نفاق أو مصلحة عشان أنا عانيت من الحاجات دى .. مفتقدة الصداقة مكنش عندى أصدقاء كتير كلهم أتجوزوا وأتفرغوا لحياتهم ومبقتش لا قية حد أتكلم معاه بحرية وحب .. كنت مفتقدة الحب وأما بلاقيه بيضيع مش عارفة ليه ,, وكفاية بقى بلاش أكتئاب


هل فكرت فى أغلاق مدونتك ؟ ولماذا ؟
فعلا أنا فكرت مرة .. كان عندى أحباط وزهق ومش عايزة أعرف حد ولا أشوف اى حد

صورتك فى المدونة ورمزيتها ؟
صورة لقطة لطيفة وعشان كمان أسم بوسى كات


لماذا دخلت عالم التدوين من الأساس ؟

volcano أتعرفت على
وعرفت ان عنده مدونة وانا بحب القراءة جدا سواء شعر أو قصص ودخلت عنده وعجبنى اسلوبه وخياله وقلت ليه لأ أما أجرب يكون عندى أجندة خاصة أكتب فيها اللى أنا حاساه على الأقل ألاقى حد يشاركنى اللى جوايا ويقول لى رأيه ويكون عندى أصحاب عالورق أحبهم ويحبونى وأنا أصلا عندى أستعداد كنت بكتب أيام الجامعة شوية خواطر كدة بس يا خسارة قطعتها وزعلت أوى بعدها


جملة قيلت فى وصف مدونتك ؟
رومانسية ورقيقة


التعليقات بالنسبة لك وأهميتها ؟
مهمة طبعا بحس بالتفاعل مع الأخرين وحبهم ليا

أحلى بوست كتبته ؟ ضع اللينك ثم أذكر لماذا ؟
بصراحة كل اللى كنت بكتبه كنت حاساه أوى عشان كنت بكتبها فى ظروف معينة زى مثلا الوليمة , مشاعر بكر بس أنا مش شاطرة فى حكاية اللنكات دى


أفضل مدونة قرأتها ؟
كتييييييييييييير جدا كل اللى بعلق عندهم


حد قل أدبه فى التعليق وكان ايه رد فعلك ؟
محدش عملها بس لو حصل مش حنشر التعليق


أسوأ مدونة ؟
مرة دخلت مدونة لواحدة مش فاكرة أسمها عشان كانت مرة وخلاص كانت كل بوستاتها ايحاءات جنسية قرفت وخرجت على طول


حيحصل ايه لمدونتك أما تموت ؟
أكيد هى كمان حتموت عشان محدش حيفتكر اللى مات ده اذا ما قفلتهاش قبل ما أموت


أديت الباسوورد لحد قبل كدة ؟

لأ ومش حيحصل بحب أوى حكاية الخصوصية والأسرار


كانت ايه طبيعة علاقتك به ؟
بأيه ؟ الشخص وللا الباسوورد ؟ عموما محدش يعرف حاجة عن البوست ده من اصحابى أو معارفى محدش حيقدر ولا حيفهم


أسمك ؟ المشهور به وسط أصحابك ؟
نونا , نانا , مشمش

عمرك ؟
جاوبت عليه فى التاج اللى قبل كدة


دراستك ؟ مجالك ؟
ليسانس مكتبات وبشتغل فى نفس المجال


شخصيتك نوعها ايه ؟
مش بحب السلبية ولا النفاق وطبعا الرومانسية شئ أساسى جدا


السفر بالنسبة لك ؟
بحبه جدا وبحس براحة نفسية فى لسفر بس هو فين


وقت فراغك بتعمل ايه ؟
بسمع أغانى وموسيقى أو أقرأ أو ادخل عالنت والمدونات وشات وكدة يعنى


المود بتاعك ؟
بحب الضحك والهزار و... ولا بلاش


الأكلة المفضلة ؟
المكرونة البشاميل والحمام المحشى والسمك والمحشى بأنواعه من الآخر بحب كل حاجة بس لو كل دولا موجودين مش حسيب الحمام خااالص


الصفات التى أخدتها من بابا ؟
الطيبة والحنية والصراحة وعدم النفاق -الله يرحمه بقى

الصفات التى أخدتها من ماما ؟
برضه الطيبة والحنية


أكتر ست حاجات بتكرهها ؟
الغدر , النفاق , الاستغلال , السلبية .. مش لاقية حاجة تانية ,اه بكره اللى
يضرب الاطفال او الراجل اللى بيضرب الست وخصوصا فى الشارع وقدام حد .. بكره الحوجة اللى تخللى حد ممكن يدوس على كرامته عشان يعيش


أكتر ست حاجات بتحبها ؟
كتير مش ستة الافلام والاغانى والقصص الرومانسية , السفر , الرحلات , كل حاجة لها علاقة بالطبيعة والانسان


الشغل بالنسبة لك ؟
بعرف اللى بيحصل فى الدنيا والعالم الخارجى وترفيه شوية لو جو البيت مكهرب وكئيب


الأنترنت بالنسبة لك ؟
عالم تانى له سحره وخصوصا البلوجات والشات


أمرره لمين ؟؟
volcano

شاب نفسه يحقق حلمه

princess dodo

هو ده حبيبى

عندى احساس انى عايزة أكتب عن الحب والرومانسية بس مش عارفة أكتب ايه .. جوايا مشاعر كتيييير حلوة , وقعدت مع نفسى وقلت ياترى ممكن تكتبى عن ايه يا بت يا نونا ؟ .. وبعدين قلت مفيش غير أنى أوصف حبيبى الأسمرانى .. ماهى ملامحه برضه كلها رومانسية .. طيب أوصف ايه وللا ايه ؟؟ أوصف عينيه وللا شفايفه وللا حنية ايديه .. طبعا حبتدى بعينيه العسلية أول أما تطل عليا أتوه أنا وأدوب من كتر الجاذبية حتى وهو لابس نضارته الطبية .. أما شفايفه لونهم أحمر ربانى , وأشرب منهم أسكر وأدوخ أصل طعمهم برضه ربانى .. أما حضنه كله حنية فى الصيف بحس كأنه اير كونديشن , وفى الشتا كله دفا وسخونة , جوة حضنه بناااام وأرتااااح وأما أصحا اقول ياسلااام هو أنا كنت فى الجنة يا ناس .. هو ده حبيبى يا ناس كله رومانسية وأحساس .. ياسلام لو تشوفوه برضه مش حتقدروا توصفوه , ماهو جوة عينيا بداريه ومن الناس بخبيه .... مش ليا حق أحبه وأمووووت فيه ...؟؟؟

جالى تاج واحد من شخصين

جالى تاج من العزيز محمد سمير وشماعة واتأخرت عليهم لظروف خاصة بس كنت سعيدة عشان كنت بشوف التاجات دى وبقول يعنى ايه تاج ؟ وجالى التاج يا اهلا وسهلا

انت مين ؟

أنا واحدة رومانسية وبحب الناس مش مهم عندى كام سنة عشان انا عندى كل سنوات العمر ببقى 18 اما اتكلم مع حد عنده 18 سنة وببقى 30 و40 و60 اما اتكلم مع اشخاص عندهم الاعمار دى

مين اكتر 6 اشخاص بتحبهم ؟

هما كتير طبعا من ضمنهم بناتى واخواتى وكل المدونين دولا

انت سعيد ؟

الحمد لله فى اوقات كتيرة فى حياتى اما بفتكرها ببقى سعيدة جدا حتى لو انتهت من حياتى

لو اجتمعت انت وحسنى مبارك فى غرفة واحدة ؟

لو اجتمعت بأى حد مشهور شخصية عامة يعنى اى ان كان مش حسأل انت بتعمل كدة ليه او ايه اخرتها فى اللى بتعمله , انا بحاول ادخل جوة ملامح الشخصية واركز فيها عشان احاول اكتشف هو ايه وشخصيته دى اكتسبها ازاى واللى بيعمله ده نابع من ايه هل البيئة اللى اتربى فيها وللا عوامل نفسية كتيرة متراكمة ودماغه دى جواها ايه وليه واحتمال كبير افضل اسأل لحد اما احاول اوصل

لو معاك مليون ونص جنيه .. تعمل بيهم ايه ؟

حطلع منهم زكاة المال او يعنى حتبرع بجزء منه لله ولبناتى جزء والباقى حخليه فى البنك لأى ظروف تحصل عشان الحوجة وحشة

بتحب مصر ؟

أيوة

بتحب البنات / الاولاد ؟

بحب البنات جدا واما كنت فى الولادة التانية كنت بدعى ربنا يدينى بنت تانية عشان تبقى صاحبة لأختها .. والاولاد برضه بحبهم بس تربيتهم صعبة

انت مسلم ؟

الحمد لله وبصلى وبصوم ونفسى اعمل عمرة وحج .. آمين

ليه ؟

طبعا اما كبرت وفهمت اقتنعت ان الدين الاسلامى هو آخر الديانات وان سيدنا محمد هو آخر الانبياء وحمدت ربنا انى مسلمة

مين اكتر شخصية متقدرش تستغنى عنها فى حياتك ؟ وليه ؟

هما نفس الشخصيات اللى جاوبت عنهم فوق

ايه اكتر موقف محرج اتعرضت له فى حياتك ؟ واتصرفت ازاى ؟

كنت راجعة من الجامعة ولاقيت ابن خالتى شاور لى وهو فى العربية ووقف عشان يوصلنى ماهو ساكن فى الشارع اللى ورانا وام رحت لحد عنده عشان اسلم عليه لاقيته حد تانى معرفوش رحت قايلة له انت قليل الادب انا افتكرتك ابن خالتى ومشيت وانا مكسوفة اوى .. كانت نفس لون العربية وماركتها حتى اللو سايقها يشبه له كتير او متهيألى كدة اصل الدنيا كانت ليل

ايه الامنية اللى بتدعى ربنا دايما انه يحققها لك ؟

الستر والصحة والمغفرة لبناتى وكل اللى زيهم وكل امة محمد عليه الصلاة والسلام وليا ولأهلى ويرحم ابويا وكل الاموات المسلمين

تمرر التاج ده لمين ؟

بصراحة مش عارفة .. ممكن يكون اتمرر عليهم وعموما

انتظار مؤقت

bos bos

قلوب حارة

ايامنا الحلوة

لومى

وكل اللى بيدخل عندى ومش جاله تاج قبل كدة

ملحوظة : التاج اللى بعد كدة هيكون تاج أنتظار مؤقت

ناس وأتغيرت

ياعينى عليكى ياطيبة لما بتضيعى منا

لما بنصحا نلاقينا بقينا حد غيرنا

وفى عز الأحتياج لحضن يضمنا

وفى عز الأشتياق لحضن يضمنا

قادرين أزاى ندوس على قلب حبنا

وبقينا ازاى كدة

أجمل ما فينا قلب أصبح حتة حجر

أتعلم الخيانة واللعب بالبشر

ومين اختار لنا واحنا ازاى رضينا

نعيش وحوش فى غابة ونقول مكتوب علينا

وبقينا ازاى كدة

وآه من يوم حييجى مليان جرح وألم

حتدور الدايرة بينا وحندفع التمن

وتصرخ مهما تصرخ ولا حد حيسمعك

مفيش مركب حتقدر بالعمر ترجعك

وبقينا ازاى كدة

ياعينى عليكى ياطيبة

كلمات الأغنية دى بهديها لناس دخلوا حياتى وأتغيروا لأى سبب من الأسباب , نسيونى ونسيوا العشرة والحب والصداقة وأتصدمت فيهم أوى عشان اثروا فيا كتير وحبتهم كتير

يوم عيد الميلاد

كانت توأمى تحب رجلا هو كل حياتها رغم أن علاقتهما لم تستمر أكثر من سبعة أشهر, ولكن السعادة التى أحست بها فى هذه الأشهر القليلة هى بكل سنين عمرها .. ولظروف خارجة عن ارادتهما لم تستمر هذه العلاقة , ولكن مشاعرها تجاهه كما هى لم تتغير .... واليوم هو عيد ميلاده , كانت تشتاق أن تسمع صوته, تشتاق جدا أن تقول له - كل عام وأنت حبيبى - ولكنها تعلم جيدا أنه لن يجيب لهاتفها , ولكنها ستفعل هذا حتى لو سمعت صوته فقط , هل تتشجع وتحدثه أم تكتم مشاعرها بداخلها ؟؟ .. لا لن تستطيع .. أنها تريد أن تسمع صوته الحنون الدافئ وفى لحظة ومن دون تفكير تشجعت و أمسكت بالهاتف الأرضى سوف تحدثه فى مكان عمله , وكان هذا نص الحديث

هو : ألو

هى : كل سنة وأنت طيب

هو : مين معايا

هى : نسيت صوتى ؟

هو : آسف النمرة غلط

ووضعت السماعة وهى شاردة لا تدرى بدموعها التى تحرق وجنتيها , ولكن بعد دقائق كانت ساعات رن هاتفها

هى : ألو

هو : أنا آسف .. مقدرتش أحس مشاعرك دى وأكسر قلبك

هى : ليه عملت كدة ؟؟

هو : أنتى عارفة أنى خايف عليكى

هى : عارفة .. بس برضه أنت عارف أنى من غيرك مش عايشة

هو : والله عارف ... متتصوريش أد أيه أنا بقاوم

هى : لا لو سمحت بلاش المقاومة دى .. ليه دايما نقاوم الحاجة الحلوة اللى فى حياتنا ودايما نقرب من التعاسة والهموم ألف خطوة

هو : حبيبتى أنا آسف بجد عشان عارف أد ايه أنتى متعذبة و أنا كمان زيك بس غصب عنى

أوعدنى ننسى العذاب ده وللا أقول لك بلاش عشان هو اللى بيخلينا نحس أد أيه أحنا بنحب بعض وقريبين أوى من بعض .. بس أوعدنى أنك متبعدش تانى

هو : أنا عمرى ما بعدت عنك بتفكيرى , كل يوم بيعدى لازم تمرى على قلبى وعقلى ... ها ايه رأيك نقضى بكرة

يومنا مع بعض

هى : بحبك أوى

هو : أنا بعشقك

ياترى حتستمر الحكاية وللا حيبعدوا تانى ؟؟؟؟ الله أعلم ...

فى حب منير

أجد دائما محمد منير أنسانا حساسا و رقيقا رغم انى لا أعرفه شخصيا , و لكن أعرفه من أغانيه فهو ينتقى الكلمات التى تمس القلب و تذهب الى الروح ويجسدها فى صوته الدافئ الحنون , أنه يستحق لقب فنان الزمن الجميل , فأنا لا أعشق صوته فقط ولكن لى زكريات جميلة لا تنسى مع هذه الأغانى العذبة , فأننى حقا أعيش معها بوجدانى و أراه كأنه يغنى لى , فعندما يقول لى لما النسيم بيعدى بين شعرك حبيبتى بسمعه بيقول آهااات أرد عليه و أقول له أنت منايا فرحى وبكايا أنت كفاية أنت أنا أنت .. هناك حوار بينى و بينه فى كل أغانيه حتى الأغانى الوطنية , و الأغانى القديمة التى يعاد توزيعها و غناءها أجدها مختلفة تماما بصوته مثل فى دايرة الرحلة , شيئ من بعيد ... الخ وغيرها كتير ولكنى الآن أركز فى شريطه قلبى مساكن شعبية لأن كل أغانى هذا الشريط لها زكريات جميلة فى فترة قصيرة من حياتى لن أنساها لأنها قريبة من قلبى .... وأخيرا محمد منير أعشق صوتك الدافئ و احساسك العالى فأنت حقا لن تتكرر أبدا

قد يكون الغيب حلوا

هل الغيب حقا قد يكون حلوا ؟؟

هل غيب الحبيب قد يكون حلوا ؟؟

هل غيب الصديق قد يكون حلوا ؟؟

لا أعتقد .. فالحبيب والصديق أشتاقهما , أفتقدهما و أحتاجهما معا .. فعندما يغيب الحبيب هل سيرجع لى صديق ؟ وعندما يغيب الصديق سيرجع لى حبيب ؟ لا أعلم , ولكن أتمنى أن يأتى لى الحبيب الصديق فى شخص واحد أحس معه الدفء , و أجرى اليه وقت الضيق و الفرح , وأسمع منه ما يريح القلب والعقل صديقى و حبيبى أفتقدك و أفتقد الحياة معك .. لا تغيب سأنتظرك قليلا أو كثيرا , و لكن سأنتظرك .. فالغيب لن يكون أبدا حلوا

حب ايه اللى انت جاى تقول عليه

أحضرونى يا أخوانا ياللى بتحبوا أو عاملين نفسكم بتحبوا - وخصوصا الرجالة - أنا خلاص مبقاش عندى ثقة فى أن فى حاجة أسمها حب من اللى شفته وسمعته من حكايات توجع القلب أنا منكرش أن الست أو البنت عليها جزء كبير من المسئولية فى أن العلاقات بتفشل وتنتهى بس ده لأن الستات والبنات اكثر عاطفة ورومانسية من الرجالة, والحاجة بقى اللى تضايق أن في منهم معارف أو أقارب .. أنا ححكى لكم حاجات بسيطة وتقولوا لى مين الغلطان - اكيد حتقولوا ال2 غلطانين- أتنين من صغرهم حبوا بعض لأنهم أولاد عم وأفكارهم - كانوا فاكرين- أنها متقاربة والتفاهم بينهم مالوش حدود وقرروا يرتبطوا وأتقدم الولد للبنت وكتبوا الكتاب ومن شدة لهفتهم على بعض وحبهم حددوا ميعاد الزفاف رغم أن الولد لسة فى الخدمة العسكرية وفى لحظة رومانسية ولهفة البنت سابت نفسها للولد وبقت مدام -غلطانة وعبيطة- المهم الولد فضل يماطل ويتحجج ويأجل الدخلة - دخلة أيه بقى ما اللى حصل حصل - المهم أنه طلع ندل وبعت لها ورقة الطلاق آل أيه مبقاش يثق فيها أزاى يآمنها على بيته وعياله وهى اللى أدت له نفسها قبل الدخلة .. منه لله.. الحكاية التانية بقى اتنين برضه قرايب ولاد خالة, البنت كان لها صاحبة - بتقول أنها الأنتيم - بتحكى لها على كل حاجة من الكبيرة للصغيرة وكانت بتثق فيها جدا لدرجة أنها كانت بتحكى لها مشاكلها مع أبن خالتها - اللى هو خطيبها - وكانت بتطلب منها تقابله وتوفق مابينهم عشان يتصالحوا - ونعم الصداقة - لكن للأسف الصاحبة دى كانت بتوصل كلام وحش أوى للولد وبتقوله خطيبتك متستاهلش واحد مخلص زيك لأنها بتعرف أولاد كتير وأما بتقابلهم بتخلع الدبلة عشان ميعرفوش أنها مخطوبة وطبعا كانت بتدبر بعض الحيل عشان يصدقها - صحيح كيد النسا غلاب - وفى يوم البنت أتفاجئت بالولد وهو بيرمى لها الدبلة فى وشها رغم الحب الكبير اللى بينهم وطبعا بعد أما أتفسخت الخطوبة الأنتيم بتاعتها غابت خالص عن الصورة وفى يوم ظهرت عشان تعزمها على خطوبتها أنتوا عارفين مين العريس ؟؟ خطيب صاحبتها اللى باعتها وباعت الصداقة عشان واحد مايستاهلش - بس بصراحة الطيور على أشكالها تقع - وفى حكاية تالتة, واحدة أتخطبت لمزيع معروف وعشان ظروف شغله كان دايما يزورهم فى أوقات مش مناسبة خالص - الراجل عنده تسجيل حيقطع نفسه - وقرر هو وأهل البنت أنه لازم يكتب عشان كلام الناس وفى يوم كانت حماتها تعبانة وراحت زارتها وبالصدفة لقت قدامها مجلة فتحتها لاقيتها عبارة عن صور خليعة كأنها قصاد فيلم من أفلام موفى تشانل - بس من غير صوت وحركة - وقالت له أنا شفت المجلة اللى بالى بالك الراجل هاج وماج أزاى تشوف حاجة زى دى البنت المؤدبة متتفرجش عالحاجات دى.. يبقى البراءة راحت فين.. يبقى خلاص مبقتش قطة مغمضة, ومن غير تفكير بعت لها ورقة الطلاق وبعد كدة راح اتجوز جواز صالونات من أقاربه آل عشان يضمن انها قطة مغمضة , بقى ده أسمه كلام ؟؟ فين الثقة وفين الحب , وحكايات من دى كتييييير أنتوا طبعا كلكم شايفينها وعارفينها , وكل ده عشان البنت أما بتحب ممكن توصل مع الراجل اللى بتحبه لدرجة العشق وياريت بيقدر المشاعر دى , وأتعقدت من االحكايات دى وكل أما واحد يتشملل ويقولى بحبك أقوله حب ايه اللى أنت جاى تقول عليه أنت عارف معنى الحب ايه ؟؟ وفضلت أبعد من حياتى شبح أو خيال أى راجل وأنا بنت .. ماهو كان ممكن يكون لى حكاية أنا كمان محدش عارف .. وقررت أتجوز صالونات وأنا ونصيبى بقى يا أحبه يامحبوش وأتجوزت صالونات وياريتنى ما أتجوزت صالونات ؟؟؟؟ لا الصالونات نافع ولا الحب والرومانسية نافع كله محصل بعضه

الوليمة : خيال واحساس

أحلى حاجة فى الدنيا أن الأنسان يحب ويتحب من نفس الشخص , أول مرة شفته فيها قلت لنفسى هو ده اللى يستحق أوهب له قلبى , حسيت أحساس غريب أوى عمرى ما حسيته فى حياتى كلها لأنى عمرى ما حبيت غير واحد بس , حسيت انى عايزة أدخل جوة حضنه وأعيش حياتى كلها جوة يبقى هو بيتى ومملكتى ومش محتاجة حاجة تانية من الدنيا غير أنى أعيش جوة حضن الراجل ده وبس , أستغربت أوى كل ده من نظرة شفتها فى عينيه وكمان حسيتها؟؟ بس هى دى الحقيقة واكيد ده هيكون أحساس عادى وطبيعى لأى حد بيحب بجد , لكن أنا حسيت أنى لازم أقول ده للدنيا كلها , وبالرغم أنى عمرى ما حسيت أزاى القبلة أو البوسة- بحب أسميها زى ما بنقولها-هيكون طعمها أزاى بين اتنين بيحبوا بعض لكن بأحساسى أقدر أوصفها بأنها هتكون حرب أو حرب على وليمة مين هيقدر يحارب التانى ويفوز بالوليمة ويشبع منها أكتر من التانى , ومفتكرش أن فى حد هيقدر يشبع أبدا لأنه كل ما هيشبع كل ما هيجوع أكتر , ده أحساسى مش أكتروفى الآخر عايزة أقوله أنت وحشتنى أوى

البرود أحيانا نعمة

ما أحلى أن يعيش الأنسان خالى البال , لا يفكر, لا يشعر بأحد , لا يهتم بالأشياء مهما كبر حجمها , فى لحظة يأس وتعب القلب قررت أن أعيش هكذا ولو للحظات -لا- لحظات هذه قليلة جدا , بل سأعيش لأيام , لأسابيع وربما لشهور - قد تبدو الفكرة مجنونة أو غير منطقية ويقول عنى البعض أننى لن استطيع , خاصة المقربين لى واللذين يعرفوننى جيدا , وهذا ممكن جدا لأننى لست من ذوات الدم البارد - الحمد لله فالأحساس نعمة كبيرة - ولكن مهما كانت الفكرة مجنونة أو غير منطقية سأحاول تنفيذها ولو لساعات قليلة , أريد فقط أن أعيش يوما هادئا خالى تماما من التفكير فى أى شئ , وهذا معناه أن قلبى سيهدأ بعض الشئ ويقال عنى أننى باردة , لا أهتم بشؤؤن الآخرين , لا أشاركهم مشاعرهم مهما وصلت بهم من أفراح أو أحزان - ياااااه - كم هو احساس البرود واللامبالاة احساس مريح حقا لا لشئ , ولكن لأننى تعبت من السؤال دائما عن الأصدقاء ولهفتى عليهم كلما سمعت شئ مزعج أو مفرح, تعبت أيضا من كلمة وحشتونى والمجاملات العائلية ومجاملات العمل , كما تعبت أيضا من اللامبالاة والبرود فى مشاعرهم تجاهى والكلمات المعتادة (عندنا ظروف, معلش, أنتى الأحسن الخ) - قد يقولون البعض أن هذا شيئا عاديا يحدث كل يوم , مش جديدة يعنى -نعم ربما يكون هذا شيئا عاديا تجاه أشخاص لا يمثلون لك شيئا , ولكن عندما تأتى الوجيعة من أقرب الأشخاص لقلبك ستفكر ألف مرة لتأخذ هذا القرار وهذا ما فعلته, والآن فقط بدأت أشعر بهذا الأحساس , سأطفئ الأنوار وأغلق هاتفى الخيلوى والهاتف الثابت وأغلق باب غرفتى وأسدل الستائر وأدير المذياع على البرنامج الموسيقى وسأنام نوما عميقا بلا تفكير أو حتى أحلام ولأول مرة بدون مهدئات أو مشروبات ساخنة - ياله من احساس جميل - الى اللقاء يا قلبى المشحون وعقلى المجنون , واهلا بك يا دنيا البرود -تصبحين على خير يا مولاتى-

مشاعر بكر

عندما تقابلا قررت أن تضع حدا لهذه العلاقة الباردة, أو بمعنى أصح لمشاعره الباردة تجاهها..فلم تشعر يوما أنه يحبها, لا يغار, لا يهتم بشؤونها, كانت دائما تتذكر كلماته وردود أفعاله أثناء أحاديثهما معا..كانت تشعر بغضب وثورة بداخلها تجاه مشاعره الباردة...

هى: انا تعبانة اوى

هو: مش أكتر منى

هى: ليه مش بتسأل عليا

هو: وأنا مين يسأل عليا

هى: يوووووه..هو أنت كدة دايما

هو: كدة ايه..أنا عادى خالص

هى: ماهى دى المصيبة, أنك دايما عادى, مش بشوف منك أى أنفعال أو حتى رد فعل لأى موقف يحصل بيننا عشان أعرف ايه اللى

اللى جواك .. تعرف ده معناه ايه .. ان مفيش جواك أى حاجة ليا -وبعد ثوانى تسأله بلهفة- بتحبنى ؟

هو: -يبتسم بسخرية- ومجبكيش ليه

هى: مش عارفة .. بس أنا حاسة أنك مش بتحبنى -وقفة- ما تخللينا أصحاب أحسن

هو: -يرد من غير تفكير- أعملى اللى يريحك

وتركها وذهب بعيدا ولكن عينيها مازالت تبعد معه, وتذكرت عندما تقابلا أول مرة فى نفس المكان ليفتح لها قلبه ويعبر لها عن أعجابه بها وحنيتها المعهودة بها, وطلب منها وعدا أن لا تتركه أبدا مثل ما فعلت حبيبته الأولى التى غدرت به من غير مقدمات أو أسباب, وظل فى عزلة وأكتئاب شهورا لا يعرف عددها , حاول أن ينساها ولكن دون جدوى وقرر أن ينساها بأمرأة أخرى... فى هذه اللحظة فقط أكتشفت أنها المرأة التى قرر أن ينسى بها حبيبته الأولى...- يا خسارة للدرجة دى جرح المشاعر واللعب بها سهل اوى كدة؟؟؟- و ظلت تبكى من شدة الألم والجرح لمشاعرها البكر.

أنت يا من أحببته بقوة...
لو تعلم أن عطرك هو الهواء الذى يملأ صدرى فيعيدنى الى الحياة..
وأن القبلة من شفتيك هى الماء الذى أرتوى منه فأحيا..
لو تعلم أنك تسرى فى جسدى كالدماء.. لو تعلم...لو تعلم؟؟ لألتصقت بى بشدة وما تركتنى أبدا وطبعت على شفتيا قبلة الحياة .. لأنك كل الحياة.