ياعينى عليكى ياطيبة لما بتضيعى منا
لما بنصحا نلاقينا بقينا حد غيرنا
وفى عز الأحتياج لحضن يضمنا
وفى عز الأشتياق لحضن يضمنا
قادرين أزاى ندوس على قلب حبنا
وبقينا ازاى كدة
أجمل ما فينا قلب أصبح حتة حجر
أتعلم الخيانة واللعب بالبشر
ومين اختار لنا واحنا ازاى رضينا
نعيش وحوش فى غابة ونقول مكتوب علينا
وبقينا ازاى كدة
وآه من يوم حييجى مليان جرح وألم
حتدور الدايرة بينا وحندفع التمن
وتصرخ مهما تصرخ ولا حد حيسمعك
مفيش مركب حتقدر بالعمر ترجعك
وبقينا ازاى كدة
ياعينى عليكى ياطيبة
كلمات الأغنية دى بهديها لناس دخلوا حياتى وأتغيروا لأى سبب من الأسباب , نسيونى ونسيوا العشرة والحب والصداقة وأتصدمت فيهم أوى عشان اثروا فيا كتير وحبتهم كتير
هناك ٣٩ تعليقًا:
ياه اول حد؟؟؟؟؟
محصلنش من زمان
وليل تبريحنا جاريحنا نضيع وتضيع ملامحنا
نتوة فى زحمه العالم منلقاش نفسنا مالم لروحنا نعود ونبقال احنا
تحياتى
دنيا تدور واحنا ندور وهي بتدور سوا بينا
العزيزة بوسي كات ازيك عاملة أيه
أنا النهارده تعليقي مستعار من أغنية محمد منير
ثانيا أنا حبيت اسيب تعليقي علشان متزعليش مني وأحب أقولك
أني منتظر تعليقك على الجزء الاخير من عفوا حبيبي متقدرش ومتعرفش
http://sfahmy78.blogspot.com/2007/06/blog-post_27.html
حمد الله ع السلامة يابوسي مبسوط اوي انك اتكلمتب وخرجتي اللي جواكي
يابوسي اللي ينساكي انسي ومتسأليش فيه وان كان هانت عليه العشرة يبقى هو اللي مكانش يستاهلها من الاول
مهما حصل بين الاصحاب والاحباب لازم العشرة والود يكونوا موجودين واذا فقدوا يبقى مكانش ليهم لازمة
تحياتي ليكي
محمد سمير
صباح الصباح
ليه المأساوية دي يا بوسي،ايه اللي حصل؟
عموما.. اللي يهواك اهواه.. واللي ينساك انساه
و غمض عينيك وامشي بخفة و دلع
واضحك للدنيا تضحكلك, وكدة يعني
الكلام ده مش انشا، أي واحد فينا بيقابل المواقف دي كل يوم.. بس لازم يدي ضهره و يكمل مسيرته في الحياه
ربنا يروقلك بالك، و تخرجي من المود ده وتجيلنا بالسلامة
هممممممممممممممممممممممم
الدنيا كدة يا بوسى
ناس بتتغير وناس بتتبدل وناس وناس وناس دة الطعبيى
الثبات مش من طبيعة البشر..
اتمنى فى النهاية تكونى اتعلمتى وتفضلى اقوى
بوسي هانم
اخير الجديد نزل
يااااااااااه
اخيرا خرجتي من كلاللي كان جواكي
تحياتي
ما أصعب الفراق، من شخص قريب وعزيز علي قلب إنسان آخر متيم بيه حتى الثمالة.
اتمني لكي أن تتعلمي من الدرس وان تأخذي حيطة في المرات القادمة
كريم
اصعب حاجة في حياة الانسان هي الخيانة
لكن في نفس الوقت هيه اللي بتدفع
الواحد مننا انه يكمل طريقه
ويشق الطريق اللي اختاره لنفسه
ويثبت للي خانوه انهم الخسرانين مش هوه
ارمي ورا ظهرك وكملي طريقك
تحياتي
اه حاجة تانية
اغلى حاجة عند الانسان هيه دموعه
خليها تنزل على اللي يستاهل وبس
تحياتي
كلمات الأغنية واقعية وبتنطبق على حاجات كتير بقت بتحصل فى زمنا الأيام دى
تحياتى لكى
تسجيل اعجاب بمدونتك
وعلى فكره الاغنيه دى بيحبها ابنى جدا
مش عارف يعني اقولك ايه
انتي عارفه ان كل حاجه جميله ليها عيب والناس الرومانسيين برغم جمال مشاعرهم انهم بيتصدموا بسرعه في الناس وينخدعوا ويتاثروا قوي باللي بيخونهم عايزك ايوه تكوني رقيقه ورمانسيه لكن عايزك برده قويه وصلبه عشان متتصدميش في الواقع قوي وتكتشفي ان الناس بتتغير كل ثانيه مش كل يوم عايزك تكوني اقوى
وبجد اللي بيخسر صديقه عشان الدنيا هو اللي بيخسر مش الصديق عشان الصديق الحقيقي كنز ميتعوضش ابدا
تحياتي يا رقيقه
سلاااااااااااااااااااااااااام
انا بحب الأغنيه دي جدا
شكرا على الكلمات
مع انى مش باحب الاغنيه بس المعنى نفسه جميل
مش منالطبيعي ان الانسان يفضل هو هو طول حياته لا لازم يتغير
ودي سنه الحياه
تحياتي
مش من الطبيعي ان الانسان يفضل علي طبيعته طول العمر
لا لازم يتغير
دي من سنن الحياه
تحياتي
بوسي التاج الي عندي انا بمررو ليكي و كل تااااج و انتي طيبه وريني همتك فيه و مطنشيش
تحياتي
ازيك عامله ايه
بصي هقولك
الدنيا هتمشي سوا بينا او من غيرنا
وكمان الطيبه دلوقتي بقت حاجه نادره جدا مش بعيد تكون معدومه
يبقي عادي لما تضيع من اي حد مش عيب
تحياتي
هاي يا قمر كنت كتبتلك تعليق مش لاقيه فا مش عارف و صلك و لا لاء
مبقتش فارقه
تضيع الطيبه او نفضل بطيبتنا
مش عارف ليه الناس اتغيرت مبقتش زي زمان
لما كنا اطفال كان الحنان عند الناس بيحسسني انهم كلهم حوليا
لكن دلوقتي
مفيش حاجه اسمها طيبه
تحياتي
قلبتي عليا المواجع ... فعلا الناس بتتغير فجأة كده انا كان ليا صحبتي الانتيم اتغيرت معايا اوي من ساعة ما اتجوزت .. ولاتعرفني واتغيرت معايا خالص مش عارفة ليه تفتكري الحب والطيبة والصداقة بتضيع فعلا في الدنيا دي
تحياتي
اعملي الخير وارمية مش في البحر
في ميزان حسناتك
حمدلله علي السلامة
طالما احنا عايشين يبقى هانقابل ونصاحب ونسيب ونحب ونكره
اهم حاجه انه مش تبكي على حد سابك وتاكدي انه لو كان الاصحاب اصحاب بجد فمهما يمر من وقت بدون لقاء فلازم يكون فيه ذكرى طيبه هاتجمعهم
غير كده يبقى غلط انه نقول عليهم اشخاص مقربين وصدقيني العلاقه اللي تقوم على اي حاجه غير الحب بدون مصلحه هي ف النهايه علاقه خاسره
سيبك انتي كفايه وجودك معانا
بوسي
اللي ينساك انساه واللي يسلاك اسلاه يا قلبي
بصي يا ستي لما تحسي ان في حد ماكانش يستاهل حبك واهتمامك ما تزعليش عليه لانه في الحالة دي ما يستاهلش زعلك برده
سلامي
انا معاكي في كل حرف من حروف الاغنية دي ،، بس برغم الحزن اللي بتنادي بيه الحروف ، فيه جواها رسالة تحذير بتقول ..... خلوا بالكوا
ميمي
http://mimayaa.blogspot.com/
تحياتي
اولا انا دخلت لاطمئن عليك و للاطلاع علي اخر نشاطك..
ثانيا البوست بالرغم من أنه حزين...الا انه ممتع في قرأته...و يكاد القاريء ان يعيش معك في التجربة.
ثالثا..موضوع البوست نفسه..مهم لانه بيمس علاقاتنا اليومية في الحياه.
و قد مررت بمثل ما مررت به انت...و بالتأكيد معظمنا مر بنفس التجربة..
و الان حين ابني اي علاقة جديدة...احتسبها لوجه الله...و لا أنتظر منها اي شيء الا ثواب رب العالمين و اعتقد ان هذا هو أفضل شيء لان التعامل بيننا كبشر اصبح من انواع الجهاد في الحياة الدنيا.
تحياتي و اسأل الله العظيم رب العرش العظيم ان يمنح الجميع السعادة و يجنبنا
منغصات الحياة.
بس ياريت يفهموا ويقدروا
momken
ّّّّّ******
مبروك انت فرحان عشان انت اول واحد يابنى لك رب اسمه الكريم تحياتى انا كمان
Shreif fahmy
************
هو فى احلى من منير , انا مش بحب ازعل من حد وبحب كل واحد يتصرف زى ما هو حاسس ان شاء الله جاية لك عشان الجزء الاخير ... شكرا
غمض عينيك
**********
محمد انت عندك حق بس ده مينفعش فى كل الاحوال ولا مع كل الناس .. تحياتى لك
Egyptian
*********
الله يخليك انا احسن دلوقت اشكرك بشدة
غزالى
****
اللى انت بتقوله انا عارفاه كويس وبتعلم منه .. تحياتى لك
شاب نفسه يحقق حلمه
×××××××××××××××××
اخيرا ياسيدى وتحياتى لك انت كمان
شماعة
××××
كلامك صح بس ربنا يستر وميبقاش فى مرات تانية
Ahmed AL-Hussany
؛؛؛؛؛؛؛؛؛؛؛؛؛؛؛؛
كلامك جميل اوى ححاول اعمل كدة , تحياتى
بسبس الجميلة
>>>>>>>>>>>
للأسف هى دى الحقيقة
عازف الناى
،،،،،،،،،،،
اما ابنك بيسمع الكلام الصعب ده وبيحبه طيب انت بتسمع ايه ؟؟ شرفتنى
الشنكوتى الكبير
**************
انا اللى بشكرك على كلامك الجميل
e7na
****
فعلا المعنى جميل اوى .. اشكرك
أنا
___
بس المفروض التغيير يبقى للأحسن مش الاوحش
أنتظار م,قت
___________
أزيك أن شاء الله هجاوب عليه وبعدين الأسئلة صعبة اوى ... التعليقات بتوصل الاول عالاميل وبعد كدة انا اقبلها او ارفضها .. يعنى دواعى امنية هههههههه
شاب نفسه يحقق حلمه
****************
اكيد طبعا الدنيا مش هتقف على اى حد والدايرة بتلف .. تحياتى لك .. انت مالك ؟ فى حاجة مضايقاك ؟ عموما الطيبة صفة بقت نادرة انت لسة ياما حتشوف بس المهم تكون خبرة صح
أيامنا الحلوة
***********
اكيد طبعا بتضيع بس صاحبتك دى ممكن يكون جوزها صعب شوية ولو ان اى حد عايز يحافظ على حد بيعمل اى حاجة عشانه ؟؟ أشكرك اوى
تفانين عادل
*********
ربنا موجود .. تحياتى
ولو
***
كلامك حلو اوى أحلى حاجة فى العلم ده ان بقالى اصحاب عالورق وبحس انى اعرفهم بجد اشكرك جدا
mimi
****
حاضر ححاول اعمل زى الغنوة ما بتقول
المجهول
*****
ياعينى عالناس اللى بتقرأ اللى مابين السطور .. تحياتى
الربان
*****
أشكرك على كلامك وفعلا مفيش حد مش بيحصل له ده ..تحياتى
sendbad
*********
ياريت .. بس مفتكرش ,, أشكرك
مال لونك حزايني كدا ليه يا معلم فسواني؟
سمعنا حاجة تفرحنا....عايزين الشعب يعيش ويهيس
على كل حال
كويس انك بخير
ايه يابوسي حساكي جواكي حزن وشجن جامدين قوي يمكن غصب عنهم ياروح قلبي تحياتي ليكي وصدقيني اللي بيبعد اكيد غصب عنه وخصوصا مع حد زيك
طهقان
******
يعنى الدنيا مش بتفضل على حال واحد
قلوب حائرة
*********
اشكرك على كلامك الحلو
الكلمات جميلة ومليانة احساس
الشكل العام للكلمات
هو شعر غنائي
سلس وبسيط وخالي من الكلمات المكلكعة
فعلاً أحسنتي
ودعوة أخرى لزيارة مدونة شاعر من الطيور المهاجرة تستحق الزيارة
http://mosaiiic.blogspot.com/
بين طرفة عين وافتاحتها
يغير الله
مابين حال إلى حالي
حسن ارابيسك
***********
الكلمات دى كنت حاساها اوى عشان جات فى فترة فى حد عزيز عليا اوى اتغيرت يعنى كانت عالجرح .. اشكرك واكيد حدخل حالا عالمدونة واقول لك رأئى كمان .. على فكرة التعليق بيوصل الاول على الاميل وبعد كدة انا اسمح انه يتنشر او ارفض
طهقان
*****
على فكرة انا مش عارفة ادخل عندك خالص مش عارفة ليه ولا عند طهقانة هو فى مشكلة ؟؟؟
الغزيزة
bocycat
اول مرة سمعت فيها الاغنيه دى بكيت
وتانى مرة وثالث مره وبعدين ابتدى يبقا شجن وبعدين بقا مجرد تأثر بكلمات جميله معبره عن حاله كلنا ممكن نمر او مرينا بيها فعلا
دوام الحال من المحال
ومش كل الناس بتقدر تنسى اللى بينسوهم بس مع الزمن حده الالم حتقل ولكنها لن تتلاشى تماما يظل دائما كناك اثر عميق لا يزول
تحياتى لك يا قمر
يعنى الى لفت نظرك بس انتى اول واحد
طيب لك الله
على قد ما كل كلامك مظبوط جداً وبيجي على الجرح على طول
على قد ما طول ما إحنا عايشين مسيرنا هنقابل ناس كتير وهنفارق ناس كتير
المهم إننا إحنا اللي منتغيرش ونفضل على طيبتنا وحياتنا الحلوة
تحياتي ليكي
إرسال تعليق